ما تْكونْ حْمارْ

مين إنتا؟

لَح خَبْرَكْ

إنْتا نُمرا .. نسمة … عَدَدْ

إنْتا ضريبة لَلْدَوْلة

إنْتا صوت باْإِنتيخابات

إِنْتا خْلِقت وَرْقة بيضة

وكَتَبوا عليك كلّ شي بدّونْ

خَلّوك تفكّر أفكارُنْ

تْصَدّق كذْباتُنْ

تِحكي كِلْماتُنْ

وتْحَقِّق أهْدافُنْ

صِرِت إنتا لعبة بِ إيْدَايُنْ

بْتِسْتَعْمِل كِلّ إبتيْكاراتُنْ

وْ بِتْضَلّكْ مشغولْ فِيُنْ

يا ريتْ جاييْك شي منُّنْ

ليش؟؟

كرمال تْضَلَّك هيكْ

يْضَلُّن مْسَيْطْرين عْليكْ

… يِتْسَلّوا فيك

يِبْقَ عقْلَكْ بايِخ

بلْهَبَلْ تْضَلّْ دايِخْ
عَ بَيْتَكْ فوَّتُّنْ

عَ رِفْقاتَكْ عَرّفْتُنْ

شَكْلَكْ فَرْجايْتُنْ

وأسْرارَكْ خَبَّرْتُنْ
بسْ شو؟

بَعدَكْ بِتْقولْ إِنَّكْ

عَندَك خْصوصِيْتَكْ
إِنَّك مُواطِنْ حُرّ

رَأْيَك حرّ
حَبيبي

إذا ما بإِيتْ بهْلة هيكْ
إي، بْعِيْد الشَّرّ
بْيِقِتلوكْ

جَرّب تْغَدّاهُم قَبِل ما يِتْعَشّوكْ

فَرْجيْيُنْ إِنتا مينْ وْشوْ عَلَّموكْ
حْلامْ

مِتِلْ ما كِنتْ تِحْلَمْ

قَبِلْ ما لَوَّثوكْ

وْ كَتَبوا عليكْ

وْ حَطَّموكْ

كَبِّرْ عَقْلَكْ

هايْدا كِلّو ما بيفيدَكْ

وْلَوْ كِلّْ جِيْلكْ هيكْ صارْ

جَرِّبْ إنتا ما تْكونْ حْمارْ

Advertisements